As cunchas de vieira terán un protagonismo especial na Gran Final, pois constituirán un xeito moi galego de substituir ás carracas de plástico chegadas do outro lado do mundo á hora de animar ás e aos triatletas nas gradas do Centro Galego de Tecnificación Deportiva.
Así o concebiu unha liña de traballo da área de sustentabilidade da Gran Final, que xuntou neste concepto varias acepcións: orixe, ruido, folclore, natureza, proximidade e orixinalidade, cinco elementos que conflúen nas ideas dun evento atento aos detalles máis senlleiros.
Trátase dunha acción na que colabora a empresa evisceradora Porto de Cambados e a Asociación de persoas discapacitadas intelectuais Virxe da O, que se encargaron de engarzar unha fita entre cada dúas cunchas para construir unha especie de castañola de maior tamaño.
A vieira é todo un elemento ecofuncional en Galicia, xa que se foi convertindo en símbolo xacobeo, según a teoría máis xeralizada, grazas á súa “condición” de vaso para beber das fontes mentres se fai o camiño. Tamén últimamente, na etapa na que o tabaco era un costume máis xeralizado, as cunhas de vieira facían de cinceiros en todo o país. Iso sen contar o seu carácter decorativo e simbólico, que inclúe un pequeno edificio relixioso na Illa da Toxa, que foi recuberta completamente de cunchas como antídoto contra a humidade, fórmula que pode verse nalgunhas paredes medianeiras expostas ao vento.