O xornalista de Radio Pontevedra e ciclista Ramón Mella, coa compaña de luxo do triatleta Pablo Dapena realizaron un “recoñecemento” dun circuito de bici que presenta como novidade o seu decorrer polo centro da cidade. Mella e Dapena van comentando cordialmente as características do percorrido elite e o que realizarán os Grupos de Idade, que se achegan ao Concello de Barro.
A “subida da lúa” en referencia a unha popular sala de música deste lugar de Cerponzóns é unha das zonas ás que os dous se achegan coas súas bicis, pero onde está a novidade é no percorrido perimetral do Centro Histórico, xa que abandonan o río para coller pola rúa Arcepispo Malvar, circunvalan as ruinas da antiga muralla do Campiño e a Basílica de Santa María, sen dúbida o treito máis característico da nosa paisaxe urbana.
Máis tarde seguen por diante do Concello e Michelena para chegar a outro dos lugares icónicos: o santuario da Peregrina, que superan para chegar a Benito Corbal e coller Cobián Roffignac cara ao río.